అతిథి గృహం
మానవ జీవితమొక అతిథి గృహం
అనుదినమొక అపరిచిత అతిథి
సంతోషం
నైరాశ్యం
నీచత్వం
అరుదుగా
క్షణమాత్రపు ఎరుక
అనుకోని అతిథులు
అతిథులెవరైనప్పటికీ
ఆహ్వానించు
గౌరవించు
విలయకాలపు గాలులవలె
నీ ఇంటిలోని సర్వాన్ని
ధ్వంసం చేసి
ఊడ్చుకుపోయే
దుఃఖపు సమూహాలయినప్పటికీ
వారిని గౌరవించు
వారు నిన్ను రిక్తం చేసేది
అనాహ్వానిత శాంతి కోసం కావచ్చు
ఒక నల్లని ఆలోచనో
లేదా,
అవమానకరమైనదో
మలినమైనదో
నీ వాకిలిలో
నిలుచున్నప్పుడు
నవ్వుతూ లోనికి
ఆహ్వానించడానికి
సంకోచించకు
నీ ఇంటికి ఎవరు వచ్చినా
వారి పట్ల కృతజ్ఞతగా ఉండు
ఎందుకంటే
ప్రతి అతిథి
నీకు మార్గనిర్దేశనం చెయ్యడానికే
అనంతత్వం నుండి
పంపబడతాడు
మూలం: రూమి
అనుసృజన, చిత్రం: శ్రీరామ్
No comments:
Post a Comment