గ్రహాంతరవాసి పెయింటింగ్

అనుభవం ఆవిరైపోతుంది
జ్ఞాపకం చప్పబడిపోతుంది
జీవితమూ ఒక రోజు చల్లబడిపోతుంది

వెనుకకి తిరిగి చూస్తే
నడచివచ్చిన రహదారంతా
మాయమై ఉంటుంది

అంతుచిక్కని మార్మిక పొగమంచు...
అందని ఆకాశం క్రింద
కాలి క్రింది నేల కూడా కంపిస్తూ ఉంటుంది
కాస్తోకూస్తో నువ్వు నమ్మగలిగేది ఆ నేలని మాత్రమే
అదీ మాయమైన రోజున ఏది మిగులుతుందో జీవితానికి?

నిన్ను నువ్వే నమ్మలేవు
నీతోనే నీకు రాద్ధాంతం
నువ్వెవరో నీకే తెలియదు
స్వల్పమైన ఎరుక గల మరమనిషివి నీవు
ఆ ఎరుకని కూడా నమ్మలేవు
లైఫ్ ఈజ్ అన్సెర్టినిటీ
జీవితమొక అనిశ్చిత మేఘం
నిగూఢ నక్షత్ర ధూళి
గ్రహాంతరవాసి పెయింటింగ్

Digital Art : Sriram